關愛基金的始作俑者煲呔曾真係「關人」個關，一於吹口哨瀟灑放假；而關愛基金主席唐唐亦熱心祖國事，到四川成都訪問公幹，任由民政事務局局長曾德成一夫當關，肩負關雲長的角色，向立會交代「乞唔到錢」嘅尷尬蒙羞時刻。唔使講，德成局長義薄雲天，在眾多議員炮轟下，只能滿身「帶箭」，敗走「麥城」，認真慘情。局長擋箭，站在前線，佢份高薪厚酬，睇怕九成九係「代做箭靶費」，真係有血有淚。
關愛基金擺到明就得唔到商界認同。原先話由政府與商界各出五十億，用來扶貧幫助Ｎ無人士，可惜半年已過，話就話籌到十八億，實際到手的只係得六億八千萬。可憐德成局長還面不紅氣不喘咁話：籌到的捐款並非一個「細」數目，又話基金並非配對基金，希望不論外界捐款額多少，議員都能通過政府注資五十億元。
夕陽政府真係反口覆舌，說過算。明明係「配對」，如今睇嚟有排都未達標，卻焗議員通過，這不是逼議員亂開期票嗎？再講，關愛基金落實的十個項目又求求其其，麻煩不斷，故被質疑是「唐唐競選基金」。
名不正則言不順，難道煲呔曾自己腦殘之餘更「推己及人」，當正啲商家係「錢多！人傻！速捐」？佢最初大言炎炎，相信自己任內可以籌足條數。孔子曰：「古者言之不出，恥躬之不逮也！」古人謹慎約束自己的言行，怕做唔到冇面。家陣搞成咁，煲呔曾會化身「無名氏」，私底下填埋個氹嗎？