佛誕將至，香港氣氛一片祥和，就連被指專責破壞香港環境嘅環境局局長「邱騰華」都喺佛誕當日誠心懺悔，祈求各界原諒佢辦事不力，搞到環保政策一團糟。呢個「邱騰華」只係Ａ貨，其實係壓力團體「107動力」準備喺周二佛誕當日，趁長洲太平清醮期間發起「騰華佛誕祈福求消災行動」，以飄色造型扮邱騰華，諷刺佢浪費公帑。
邱騰華之前處理擴建堆填區一事，已同立法會劍拔弩張，之後宣布用成八十億元喺石鼓洲興建廢物處理設施，更惹來新界人及環保人士不滿。107動力召集人何文傑話，其實有一個處理固體廢物嘅「環保廢物熔化系統」方法，興建成本只係二十億元，但邱騰華堅拒唔採用，結果白白花多六十億元公帑。
太平清醮當日，「飄色邱騰華」會手持一個托鉢，唸經為自己消災，祈求納稅人原諒佢白白枉花多六十億元嘅擾民工程。
我哋早前報道過，煲呔曾同財爺鬍鬚曾兩位難兄難弟都係長洲太平清醮飄色主角，諷刺佢哋以大派六千元來掩飾政府嘅無能，相信到時肯定相當精彩。