政情：哥頓陳智思齊插「爛尾基金」
煲呔曾誇下海口成立一百億元關愛基金，原意由商家認頭五十億，但至今只籌得十八億元，慘變成「爛尾基金」。前行政會議成員陳智思（Bernard）話，早就睇死基金成效唔大，事關由政府牽頭實冇運行，況且商界只係想捐錢去心儀嘅慈善項目。關愛基金爛到如此田地，連合和實業主席胡應湘（哥頓）都暗批基金目標唔明確，勸政府唔好一廂情願，差在未講出口叫關愛基金早啲摺埋好過。
有商界背景嘅Bernard，身兼香港社會服務聯會副主席及樂施會董事局副主席，說話分量肯定有番咁上下。佢尋日出席一個活動時話，捐錢畀關愛基金其實只係一個選擇，有企業選擇捐錢，好可能只係為咗響應政府，如果商界唔鍾意好似關愛基金呢類咁籠統嘅基金，自然就唔願捐錢，只會捐去心儀嘅慈善項目，佢不諱言自己唔捐錢就係一個實例。
一直有講法話關愛基金會搶去其他社福機構嘅資源，Bernard都深表認同，佢話更甚係如果關愛基金搞得好，佢哋啲社福機構自然會驚資源被搶走，相反關愛基金被外界批評籌款成效差，萬一政府進行全港性募捐，咁社福機構就更加驚，資源再進一步被搶走，後果不堪設想，所以商界就會諗吓係咪仲捐錢畀關愛基金，最終令商界處於兩難局面。
衰高調搞配對基金
要引證Bernard嘅講法，不妨聽吓哥頓點講。哥頓尋日喺另一場合話，佢冇捐錢畀關愛基金，但向來有支持其他慈善機構，事關佢捐錢嘅慈善機構都有明確執行目標，所以關愛基金都應該要有明確目標，而且要一早向外界解釋清楚，不能一廂情願去做。事到如今點算好呢？哥頓笑笑口話：「不在其位，不謀其政」；Bernard亦無咁好氣話，最後有幾多錢咪做幾多囉！
不過，Bernard日行一善教精政府，佢認為政府搞關愛基金洗濕個頭，根本愈低調愈好，事關一開波就話搞一百億元，結果實收幾億，落差咁大，社會梗係有回響啦！又好似政府話要同商界搞配對基金一樣，如果當初政府肯無條件攞五十億元紓解民困，立法會又點會唔批吖？唉！睇怕Bernard都係嘥口水，事關煲呔曾呢個夕陽政府充耳不聞，遲早自取滅亡。