中環出更：張德祥太太鍾情翡鑽頭飾
衣着係一種態度，好似頂尖度身訂造男裝品牌「詩閣」（Ascot Chang）董事總經理張德祥太太范元芳，無論幾時都係一襲稱身旗袍，加上閃閃生輝嘅翡翠鑽石頭飾，呢個一絲不苟嘅打扮已成為佢個人標誌。張太笑稱，着衫係人生一大享受，人要着得靚、着得好，先至不枉此生。
視着靚衫為享受
張太總是笑臉迎人，無論春夏秋冬都穿着旗袍，配襯閃鑽頭飾及戒指，貴氣逼人，渾身散發着濃得化不開嘅中國味，佢同丈夫謙和儒雅嘅氣質十分登對。張太好鍾意翡翠同鑽石，佢話一般人會將翡翠用來做頸鏈吊墜，但佢就會搵人訂造獨一無二嘅頭飾，而佢屋企仲有幾款頭飾，輪流佩戴氹自己開心。
張太笑稱，人生應該及時行樂，佢亦都自得其樂，就以頭飾為例，到咗佢呢個年紀，如果冇咁上下多嘅頭髮，都未必戴到㗎！佢又話着衫係人生一大享受，主張人要着得靚、着得好，言談之間，將寧波人懂得享受嘅天性表露無遺。