中環出更：梁高美懿陪媽媽睇馬盡孝
沙田馬場尋日舉行賽事，唔少城中名人拖埋太太、母親入場，預先慶祝母親節嘅溫馨場面停不了。恒生銀行副董事長梁高美懿最有心，知道媽媽鍾意睇賽馬，所以特登帶媽媽入場玩，梁太兩個寶貝囡囡亦全程陪住，三代同堂，場面溫馨。梁太話，入馬場係母親節節目之一，尋晚同今晚仲會食飯慶祝，佢祝願媽媽身體健康、長命百歲。
廖長江李寧拉頭馬
全家溫馨現身嘅仲有大律師廖長江，佢匹愛駒「快馬當先」喺第一場以大熱姿態勝出，贏得廿八萬五千元獎金。廖長江喜出望外話，今次係愛駒第廿一次出賽，過去從未贏過，但匹馬嘅血統好好，所以一直寄予厚望，不離不棄，終於不枉佢多年來投入嘅心血。廖長江同太太及十三歲囝囝一齊拉頭馬，開心幸福盡在不言中。
「體操王子」李寧名下愛駒「桂花飄香」，都以大熱姿態勝出，為佢贏得逾三十六萬元獎金之餘，仲同太太及女兒一齊拉頭馬。卓妮見李太着住件花花靚裙，手挽藍色Prada靚袋，顯得春意盎然，佢話好開心拉頭馬，但仲未諗到點樣慶祝。今個母親節，拉頭馬又有豐富獎金，李太可以盡情享受喇！
講起「桂花飄香」匹馬，李寧話佢係廣西人，故以家鄉嘅簡稱「桂」字作為愛駒取名。佢話自己對賽馬冇特別興趣，養馬只為增加生活樂趣，又可以做吓善事喎。
卓妮