神女有心，襄王無夢，自作多情，瘀爆收場。港府為咗博取掌聲，舊年大鑼大鼓設立關愛基金，原本諗住庫房出五十億，再揼商界心口攞多五十億，湊夠一百億扶貧，點知如意算盤打唔響。
醜婦終須見家翁，立法會財委會尋日審議港府向關愛基金撥款申請，大家先至知道，原來關愛基金反應冷淡，幾乎爛尾咁滯。
民政事務局局長曾德成承認，關愛基金至今實收捐款只得六億八千萬元，捐款承諾亦只有十八億，部分仲要分三年捐贈添，真係慘不忍睹。最好笑係曾德成仲死撐港府唔會放棄五十億元籌款嘅目標。而政務司司長唐英年就焗住承認捐款同籌款目標「有距離」，但佢跌落地番揸沙，話港府注資五十億元係顯示有承擔同起帶頭作用喎。
唉，無謂死撐嘞，關愛基金推出咁耐，實收捐款仲未及目標嘅七分之一，攞啲咁嘅數字出嚟獻世，真係瘀到痹咯！
點解關愛基金反應咁冷淡？商界人士就講得啱嘞，捐款畀關愛基金就好似向政府雙重納稅，加上基金概念模糊，細節欠奉，連扶貧對象都唔知，又點可能得到支持吖。
其實，港府當初推出關愛基金就劣評如潮嘅嘞。商界直斥港府先公布一個空空如也嘅基金，然後叫人捐錢，「即係叫大家識做」，直指當局破壞咗同商界關係愈透明愈好嘅原則，更擔心唔捐錢會有「後遺症」。
有立法會議員質疑，當局根本冇把握籌款，夾硬訂出個五十億元嘅「宏偉目標」，家陣搞到市民認為商界唔關心扶貧，令社會上嘅仇富情緒火上加油，完全係添煩添亂。
講真，港府設立呢個基金，扶貧係假，「關愛」自己至係真。扶助貧困本來就係為政者不可推卸嘅責任，當局要求商界出一半錢，但功就政府領，結果關愛基金變咗可以隨時動用嘅小金庫，專門為港府施政失誤執手尾，正如有人話齋，呢個唔係關愛基金，而係「補鑊基金」就真。
呢嗱，「史上最廢」預算案派錢派出個大頭佛，被指歧視新移民，天怒人怨點收科？搵關愛基金喇！最低工資立法甩甩漏漏，打工仔未受其利先受其害，連份工都冇埋又點算？搵關愛基金喇！資助清貧學生出境遊學、增加長者牙科服務等等，統統搵關愛基金喇！唔怪得有人話關愛基金已經變成港府嘅萬金油。
計功夫茶話齋，呢個腦殘政府一廂情願，不切實際，連扶貧都搞到亂晒大龍，怨聲四起，真係唔衰攞嚟衰咯。