由○八年立法會選舉開始，現任立法會資訊科技界代表譚偉豪（IT豪）同公共專業聯盟副主席莫乃光已經鬥得難分難解，佢哋一直由立法會選舉鬥到上法庭，鬥到依家都未完，眨吓眼就過咗三年。原來今年底舉行嘅特首選舉委員會選舉，佢哋呢對宿敵又會再互相鬥法，鬥個你死我活，唔知今次鹿死誰手呢？
今年底特首選委會選舉中，資訊科技界議席由二十個加到三十個。IT豪喺背後支持嘅資訊科技界屬會約有七至八個，現正積極籌組參選選委名單，初步考慮大約派廿幾人應戰，全部都係來自唔同屬會嘅核心成員，可見佢哋幾咁雄心萬丈。
IT豪話，隨着議席多咗，業界選民又希望左右下任特首人選，令下任特首重視資訊科技，再加上佢聽聞莫乃光同民主黨副主席單仲偕都做緊準備，如果參照○六年選委會選舉一役，泛民陣營中由梁兆昌牽頭嘅「IT呼聲」派六人參選六個都贏到，嚟緊選委會之戰勢必係一場競爭激烈嘅硬仗。