政情：高達為攞獎頻捐蚊飯
立法會大樓能否喺今屆任期內搬到添馬艦仲係未知數，所以尋日喺大樓搞嘅捐血活動，隨時可能變成最後一次。全日八小時共有六十六人捐「蚊飯」，比上次得廿五個人多好多，但議員就只得四個，包括獨立議員鄭家富、民主黨李永達（高達）、工聯會王國興及進出口界議員黃定光。
高達已經係第廿二次捐血，佢笑笑口話，捐夠廿五次就有得去周年捐血頒獎禮領獎，所以嚟緊一年會捐密啲，拿拿聲攞番個紀念獎章，認真得戚。阿富就唔同，廿歲多時患過肺癆後，佢一直以為唔捐得血，直到前排先知其實好番之後兩年就可以再捐，咁啱見到立法會有得捐血，所以咪嚟湊吓熱鬧囉。