政情：唐家成望增特殊學額
英基學校協會新主席唐家成月初正式上任，原來佢同英基有好大淵源，一對仔女喺英基畢業外，佢仲有一位患輕度弱智嘅養子唐志達，當年都想入英基讀書，但因為特殊學生學額短缺而無緣入讀。如今唐家成就任英基主席，講明重視特殊學生學額問題，希望喺三至四年內增加五十個特殊學生學額，即係增加至近三百個。
五十六歲嘅退休會計師唐家成喺香港土生土長，十七歲到威爾斯讀書及結婚，三十歲回流香港。由於佢嘅外籍太太經常到孤兒院探訪，當年就領養咗一位三歲嘅志達，如今志達已經廿二歲，外出打工自食其力。唐家成話，志達係全屋唯一鍾意陪佢食中餐嘅人，令佢特別開心。
英基每年接受政府資助約二億八千萬元，佔學校營運收入約兩成，所以家長不滿英基年年加學費，今年仲要加百分之二點八。唐家成話，現正同政府商討資助嘅問題，希望資助不減反加之餘，還要商討翻新旗下三間校舍嘅問題。而英基屬下兩間私校亦將於新學年加學費，幅度由百分之五至六點六。