政情：周總獻花冧暈陳婆婆
港鐵小股東、退休校長陳婆婆每年都反轉港鐵股東會，佢尋日又喺港鐵股東會出現。去年陳婆婆狂鬧港鐵孤寒，股東會連餅都冇得食，但今年佢似乎收咗火，仲送咗自己丈夫嘅著作《標點符號研究》畀港鐵行政總裁周松崗（周總）做離任禮物。今年港鐵有備而來，預備咗紮鮮花送畀陳婆婆，氹到婆婆即時冧晒，直呼：「我要暈喇！」
陳婆婆第一個舉手發問，港鐵主席錢果豐賣口乖話：「陳校長，早晨！」但陳婆婆一啲都唔受落，話唔好咁樣叫佢喎。陳婆婆話，想送啲嘢畀就嚟離任嘅周總，話口未完，笑容滿面嘅周總已經由台上行去陳婆婆身旁接收禮物。此時，台上嘅錢果豐又出招，話要禮尚往來，由周總獻上一紮鮮花，氹到陳婆婆冧晒，直呼：「我要暈喇！」仲話自己唔係嚟踩場，而係嚟表達愛，惹來一片爆笑聲。
不過，轉頭陳婆婆又開始數落港鐵孤寒，話對港鐵提供畀長者嘅兩蚊車程優惠好失望，事關限時限候，相反深圳日日都有優惠。陳婆婆又話，下次股東會應該安排喺有長者優惠嘅星期三舉行，或者送免費車票畀出席嘅小股東喎！