政情：李慧琼跑出民記內訌
民建聯早前選出只得三十七歲嘅立法會議員李慧琼（Starry）做副主席，令外界認定佢會參選明年立法會超級區議會議席，但原來民記呢個舉動，喺黨內引起極大爭議同不滿，尤其係Starry以外嘅其他第二、第三梯隊成員，隨時爆發內訌。Starry最後係咪上到位，仲係未知之數，但事件揭露民記舊人唔退、新人未掂、出現青黃不接同內部派系鬥爭，係不爭嘅事實！
舊人唔退新人唔掂
下屆立法會將增加十個議席，令好多民記第二、第三梯隊以為有機會上位，點知最近發覺表錯情。消息指出，民記上屆幾經辛苦，先捧到Starry同陳克勤兩名新人上位進身立法會，前者嘅表現尚算中規中矩，後者就非常一般，反觀泛民嘅第二梯隊，好似民主黨甘乃威、公民黨陳淑莊、以至社民連陶君行等，個個都砌得吓，令人擔心民記換血太快，會令整個立法會形勢向泛民傾斜。
再者，民記成日逆民意死撐煲呔曾政府，肯定影響選情，所以民記初步打消咗黨主席譚耀宗、資深議員葉國謙同陳鑑林等人嘅退休念頭，要佢哋留低再選一屆，令本來有望喺下屆接棒嘅新人葛珮帆、陳恒鑌同陳曼琪等，隨時出唔到閘，對Starry迅速上位自然不是味兒。
本來Starry轉戰超級區會，空出佢原先代表嘅九龍西直選議席，民記九西支部嘅新人理應好高興，但事實亦並非如此，因為同屬九西嘅油尖旺區議會主席鍾港武同深水埗區議員鄭泳舜，都對Starry個位虎視眈眈，甚至有啲其他區嘅第二、三梯隊，都想「空降」九西爭埋一份，真係亂過亂世佳人。
克勤仔失勢冇碇企
今次Starry獲黨高層力撐上位，亦間接印證咗同梯嘅陳克勤失勢。眾所周知克勤仔嘅舊師傅劉江華，早已轉為力捧葛珮帆，面對其他建制派競爭，民記好難喺新界東再爭多個位，克勤仔下屆隨時無處容身。不過，近年克勤仔已轉投張學明旗下嘅新界社團聯會（新社聯），要靠新社聯保住議席。
新社聯尋日換屆，身兼元朗區議會主席梁志祥做會長，陳勇做理事長，其中梁志祥同克勤仔一樣都係民記成員，但克勤仔只係十五個副理事長嘅其中一位，新社聯係咪咁容易過到票畀佢，將成為疑問。