中環出更：施榮忻激讚貴州多可愛
貴州茅台，聞名中外，原來當地美女都唔少。卓妮日前喺一個貴州招商推介會上，見到一位長髮大眼睛，氣質清秀嘅美女，打聽之下，原來係貴州省委書記栗戰書千金栗潛心。雖然栗小姐唔係貴州人，但佢對貴州情義濃，仲愛上飲茅台添！
推介會上，身為貴州省政協嘅菁英會創會主席施榮忻（Jaime），及身兼百仁基金創會主席嘅恒基地產副主席李家傑都有現身，見佢哋同栗小姐有講有笑，莫非交流貴州嘅所見所聞？原來栗潛心十個月前加入菁英會做執委，現時任職投資銀行，係叻女一名。
避暑之都 民風熱情
講起貴州商機，Jaime就話並非獨沽一味只有茅台，杜仲、天麻、辣椒都好出名。投資旅遊亦唔錯，事關當地係避暑之都，聞名中外嘅黃果樹瀑布，更係氣勢磅礡。若數難忘事，仲係貴州人嘅熱情。話說十年前，Jaime初次到訪貴州，喺酒店遺失戒指，酒店職員打鑼幫佢搵戒指，翌日仲物歸原主添。
唔少貴州人生活喺偏遠山區，三餐難溫飽，Jaime早前以家族名義興建一間希望小學，助小朋友讀書識字。至於李家傑本身家族，都喺當地發展緊燃氣同煤礦，生意瓣數認真多。
