中環出更：林欣彤素顏Look「拍拖」聽歌
未出道已經唱紅咗嘅小巨肺林欣彤（Mag），如今成為樂壇小紅人，吸金能力直逼唔少前輩，但人紅並無損佢勤力學習嘅態度。
揀CD似搵參考書
卓妮早幾日下晝途經中環中建大廈，就見到阿Mag同緋聞男友羅孝勇（Sheldon）喺hmv入面睇CD同試聽新歌，雖然外傳兩人拍拖，但見佢哋冇乜親密舉動，反而互相交流音樂心得，真係夠晒勤力。
阿Mag貴為上位新人，但小妮子衣着都仲係好親民，穿着T恤、牛仔熱褲及波鞋，加上零化妝嘅素顏Look，感覺非常清純。卓妮見佢走到其中一部CD機試聽十分鐘後，又到另一部CD機再聽十五分鐘，期間非常專心。試聽完歌後就轉去揀CD，十足學生哥喺圖書館搵參考書咁款。
差唔多大半小時後，卓妮就見阿Mag個「巨聲幫」同學仔Sheldon出現，原來佢哋分開咗各有各揀CD，當時Sheldon攞住大疊CD走去問阿Mag邊隻好聽，阿Mag亦好用心幫手揀選，見佢哋兩個相當認真。正所謂「台上一分鐘，台下十年功」，阿Mag咁勤力學習，難怪唱功進步得咁快喇！
卓妮