中央政策組雖然一般被稱為智囊，之不過功夫茶硬係覺得佢哋其實非常之咁窩囊，點解？一來做事糊糊塗塗，二來敢做又唔敢認，呢啲咪就係窩囊嘅表現囉！
嗱嗱嗱，講講中策組一個倒米動作先吖。財政司司長曾俊華發表「史上最廢」預算案，民怨沸騰都唔使再介紹嘞，就喺「仇曾情意結」鬧得滿城風雨嘅時候，由首席顧問劉兆佳率領嘅智囊唔係幫手平息民怨，反而設計一份民意調查問卷，題目居然係「曾俊華應否下台」。
嘩！畀着你係鬍鬚曾本人吖，見到呢一個咁大逆不道嘅題目，肯定激到吹鬚睩眼。你知啦，財爺貴體違和曾經心臟病發，萬一激到爆血管再次十萬火急送去醫院通波仔，真係多得劉兆佳唔少。
好嘞，事件被揭發之後，你估首席顧問有乜嘢回應吖嗱？哈，佢老哥耍手擰頭死都唔認喎。所以話啫，一來做事糊糊塗塗，二來敢做又唔敢認，呢啲咪就係窩囊嘅表現囉！
到咗前日，立法會議員追問政制及內地事務局局長林瑞麟，到底有冇咁嘅事呀？林D9終於默認中策組曾經做過「類似課題」嘅民調。換言之，中策組倒米表面證供成立。
既然林瑞麟打破人肉錄音機慣例默認有一個咁荒誕嘅民調，議員打蛇隨棍上，追問中策組有冇民調諮詢「李柱銘係咪漢奸」同埋「陳方安生係咪忽然民主」。好一個林D9，再次冇否認。
計功夫茶話齋，做埋晒咁嘅所謂民調，浪費公帑固然係該打屁股，最慘係無聊得嚟又廢到無倫，李柱銘有乜可能唔係漢奸？陳方安生有乜可能唔係忽然民主？你煞有介事做民調，等於自暴其醜走去通街請教路人甲乙丙，喂喂喂，借問聲，劉兆佳令壽堂係咪女人？林瑞麟令尊翁係咪男人？
李柱銘親口講過「日日做漢奸」，否則李漢奸個朵唔會響得街知巷聞，問嚟都多餘。至於陳方安生咯喎，做官嘅時候從來未聽過佢話熱愛民主，一夠鐘退休就滿口民主，唔係忽然民主又係乜呢？唔通係忽然燜煮咩！
不如咁嘞，功夫茶效法中策組設計一份民意調查，題目有三條，分別係「所謂智囊是否窩囊」、「中策組是否浪費公帑」、「劉兆佳是否倒米」。如果大家覺得問得非常之咁多餘，功夫茶認㗎，畢竟呢三條題目唔使問都知道答案啦！
議員插得冇錯呀，中策組不務正業，慘變曾蔭權用嚟犒賞自己友嘅政治酬庸工具。既然係咁，功夫茶加多一條冇咁多餘嘅民調題目：中策組作為政治酬庸工具，是否應該執笠以免繼續嘥米飯？