政情：金刀梁退休後冇飯開？
行政會議成員梁智鴻（金刀梁）年屆七十二歲仍不言休，唔少人都想知金刀梁幾時會真正退下來，好好歎吓世界，點知佢尋日話，自己唔可以退休，事關一唔做嘢就會冇飯開喎。金刀梁係泌尿科聖手，手術費有番咁上下，咁多年應該儲埋唔少，佢話冇飯開擺明就搞笑啦！
全民退休保障呢個議題近期喺社會鬧得熱烘烘，作為安老事務委員會主席嘅金刀梁，尋日出席一個退休人士研討會時話，隨着人口老化，港府有必要開始研究退休保障嘅可能性，但相信要喺社會達成共識並唔容易。佢仲話，大家講退休保障時唔應該吓吓講錢，認為點樣教育退休人士打發時間、維持佢哋嘅尊嚴同形象其實同樣重要喎。
社會一直有聲音建議延長退休年齡，金刀梁擔心延長咗可能會阻住年輕人上位，認為彈性處理就最好。佢仲笑言，其實唔少醫生同護士退休後都好活躍，建議港府搵佢哋返公立醫院幫手，填補番近日公營醫院人手不足嘅問題。