政情：斌仔孖議員暢遊迪士尼
對於行動不便嘅人嚟講，無障礙交通好重要，所以早前成立嘅香港首間無障礙的士「鑽的」，啟動三個月以來，已經接載咗超過二千人次嘅輪椅乘客。鑽的仲同唔少企業一齊合辦「鑽的慈善旅程」，鼓勵企業出錢出力，嚟緊星期日就會安排多位輪椅使用者及其家人暢遊香港迪士尼樂園，屆時四肢癱瘓鬥士鄧紹斌（斌仔）都會同屋企人去玩，幫手推動無障礙旅遊。
除咗斌仔撐場外，平等機會委員會主席林煥光、立法會航運交通界代表劉健儀及旅遊界代表謝偉俊都會現身，為一眾參加者打氣。今次入場門券由香港迪士尼樂園捐出，希望鼓勵更多商界參加呢項計劃。據講參加者坐鑽的抵達樂園後，輪椅使用者直接上落各種機動遊戲及表演場地，體驗無障礙旅遊嘅真正樂趣。據講本月底仲會有其他有需要嘅人士獲邀參加旅程，真係聽見都開心。