政情：梁美芬信唔過香港教育
香港教育制度朝令夕改，當啲家長同學生係白老鼠，因此唔少高官同議員都選擇送啲仔女去讀國際學校或出國留學，用行動向教育局投以不信任票。作為兩子之母嘅專業會議立法會議員梁美芬（Priscilla）最近都面對呢個抉擇，同丈夫城市大學法律學院院長王貴國諗到頭都爆埋。
掙扎係咪送囝囝出國讀書
其實Priscilla一早就送咗兩個囝囝去一間知名國際小學讀書，希望可以加強英語能力及國際視野。本來讀得好哋哋，但直至有次佢同丈夫用普通話傾偈，囝囝居然質問佢哋點解唔講英文，令兩人深感憂慮，擔心囝囝將來嘅中文能力，於是幫囝囝轉番去本地一間傳統學校就讀。
現時Priscilla兩個囝囝已讀到初中，但佢又擔心新設嘅通識科課程同考試亂咁嚟，所以有意送囝囝去外國讀高中，點知囝囝依家又讀得幾開心，擔心轉來轉去好易有適應問題，所以暫時都未有決定。
Priscilla批評教育局真係好唔掂，強調一、兩年嘅政策失誤同延誤，已經可能改變學生嘅一生，絕對唔可以得過且過hea住做，但最近得悉教育局局長孫明揚身患重病後，佢都會收吓火唔再鬧得咁犀利，盡量鬧政策而唔鬧人喎。