政情：劉兆佳唔認做無聊民調
中央政策組近日被批評嘥公帑做埋啲無聊民調，前日再有立法會議員爆料，話中策組問過「李柱銘係咪漢奸？」、「陳方安生係咪忽然民主？」兩條問題。雖然中策組首席顧問劉兆佳尋日就矢口否認問過呢兩條問題，但佢話如果唔做調查就唔會知道問題嘅真確性喎。
其實李柱銘自己都講過要「日日做漢奸」，陳太係咪忽然民主，大家亦有目共睹，上述兩條問題唔使問都知道答案：「係」，答案咁真確，難怪佳叔話冇問過喇！
佳叔話，坊間政黨同團體都有做大量調查，而西方政府亦會做，唔做就唔知真確性。佢又話中策組做嘅調查包括香港人點睇貧富懸殊、社會政策、勞資關係等問題，又話中策組已算係做得少調查，而且調查多數為內部參考，甚少向外公布。
唔回應鬍鬚曾炒魷調查
至於中策組有冇問過財爺係咪應該炒魷嘅調查，佳叔就話政制及內地事務局局長林瑞麟已經講過，所以佢唔會回答喎。
其實佳叔話「唔做調查就唔會知道（問題）真確性」，雖然講得啱，但唔係連「阿媽係咪女人」嘅問題都要問，好似鬍鬚曾嘅「史上最廢」財政預算案搞到天怒人怨，市民梗係想佢落台啦，仲使問？