政情：係咪選特首范太兩月後拍板

范太喺去年九月曾經講過，唔會再回應任何有關參選特首嘅問題。尋日佢出席完一個研討會後，記者都係忍唔住要再問佢一次，結果佢不但與記者詳談咗十幾分鐘，仲全程面露笑容添！

范太透露有好多朋友鼓勵佢參選，所以會再考慮吓，不過又話「我仲想玩多兩個月，依家仲玩緊，畀多啲時間我enjoy（享受）啦。兩個月後希望唔使我決定，有人出嚟選咪算囉，又唔係冇人想做。」除咗朋友，咁中央有冇游說過佢參選呢﹖范太就強調中央唔會同佢講呢個問題，佢都唔會走去問中央。佢又直言就算有人已經下定決心選特首，都唔會係依家公開講，以免要開始計算選舉開支喎。

要履行職責 多條件配合

對於自己民望一直高於其他疑似特首候選人，范太好多謝市民嘅支持，不過就覺得淨係得民望係唔夠嘅。佢話民望對任何政治人物都係重要指標，但要完成任務履行職責，唔能夠單靠民望，仲要好多條件配合；例如做地方嘅領導，就要對個地方有心，個地方好時會好開心，有問題嘅時候有啲人你唔識甚至反對你嘅人，你都會關注，政治立場唔同都唔緊要；仲要有好嘅班底，政府、立法會要有同道人，得到人民信任先得。

范太重申自己有啲缺點無法改變︰「我年紀大、身體以前有過病（乳癌），咁多年都喺立法會同行政局，從來未做過政府官員，呢方面亦係缺失。咁多市民嘅福祉放喺你身上，有冇能力都要三思啦。」不過佢同時指出，自卸任立法會主席、工作壓力細咗好多之後，健康已大為改善，唯一擔心係壓力大番之後，健康會否再次轉差。

對於接連有高官被踢爆隱瞞病情，范太以自己做例子，話當年佢證實患癌後，有第一時間公布，嗰陣亦冇人懷疑佢冇能力履行公職，強調「有病就唔係罪嚟㗎嘛，話畀人聽怕咩呢﹖」對於其他官員、政要嘅做法，佢話唔知人哋唔公布係為咗保留私隱，定係唔想引起一啲不必要嘅猜疑，唔直接評論應否規定高官公開病情。