中環耳目：陳淑玲歎下午茶首選SEVVA
香港品牌發展局主席陳淑玲（Shirley）公務繁忙，又要睇住家族製衣生意，難得忙裏偷閒，佢最鍾意約埋好友去中環太子大廈廿五樓嘅名人餐廳SEVVA歎下午茶。Shirley盛讚餐廳環境舒適，安坐喺Relax嘅氣氛下，淺嘗SEVVA自家出品嘅精緻甜品，人生一樂也！
卓妮早前喺中華廠商聯合會嘅活動上見到Shirley，佢盛讚城中時尚名人郭志怡精心打造嘅SEVVA好唔簡單，事關SEVVA係自創品牌，同城中唔少歷史悠久嘅國際連鎖餐廳相比，SEVVA出品以細緻著稱，十分抵讚。
SEVVA嘅精緻菜式多不勝數，但Shirley鍾意下午茶時段去幫襯，因為佢好鍾意食甜品，勁讚嗰度啲甜品同蛋糕賣相非常之靚，品種又多，尤其係蛋糕嘅裝飾甚具創意，媲美精品。Shirley仲話，飲食要食埋氣氛至得，如果氣氛有價，加埋喺帳單上，SEVVA嘅消費一啲都唔貴喎！