中環出更：吳永嘉復古西裝玩味十足
中華廠商聯合會副會長吳永嘉（Jimmy）平時好玩得，連着衫都要找樂趣。卓妮日前見佢着咗套英國出品Mark Stephen修身西裝，右邊袋位出現孖袋設計，復古意味盡在不言中。不過，套西裝仲有個設計細節令到Jimmy暗自竊喜，大家估吓係乜嘢？
原來係五顏六色嘅西裝內裡！Jimmy話，當佢拎起件西裝時見到彩色嘅內裡就好開心。佢好欣賞Mark Stephen西裝收腰剪裁，顯得佢冇咁肥。雖然西裝有孖袋復古設計，但Jimmy無將上層袋口「開光」，只當佢係裝飾。
Mark Stephen係英國男士服飾品牌，成立於一九九○年。佢哋堅持提供傳統度身訂造質素，同時攙入創新設計元素，尤其係貼身剪裁，俘虜唔少貪靚男士嘅歡心。