政情：呂耀東地盤捱曱甴飯
做工程起家嘅嘉華集團主席呂志和，喺囝囝銀河娛樂副主席呂耀東（Francis）返公司幫手之後，集團發展更加多元化。咪以為Francis繼承大好江山，可以翹埋雙手唔使做，其實佢試過同地盤工人一齊食曱甴飯、逼巴士，都捱咗唔少苦㗎！
尋日Francis以銀河娛樂副主席身份同年輕人分享工作經驗，佢話爸爸呂志和白手興家，當佢十一、二歲時，父親陷入財困，暫時交出管理權，所以佢大學畢業後即刻返港幫手，至今已逾三十年。初時佢為咗獲得員工嘅認同，唔怕蝕底由朝做到晚，又喺地盤同工人一齊食曱甴飯，夜晚收工又逼巴士返屋企。
Francis話，集團發展到今時今日嘅規模，關鍵在於及時把握機會。例如廿幾年前，佢見香港地產市場被幾個大集團壟斷，於是喺內地大舉發展地產業務，搶佔先機。後來澳門開放賭權，佢又力排眾議競投博彩牌照。本月中旬全新澳門銀河綜合度假城即將開幕，Francis要飲多杯喇！