政情：鄭慕智續任教統會
公職多籮籮嘅律師鄭慕智（Moses），尋日再獲委任做教育統籌委員會主席一職，任期到二○一三年四月底為止，任期延伸至下屆政府。教育政策向來都係燙手山芋，要搵人領導呢個為教育出謀獻策嘅諮詢組織，好自然要搵番個政府信得過嘅人，Moses有名你叫「公職王」，政府對佢嘅信任程度相信唔使多講。
唔好睇小教統會主席呢個位，記得前財政司司長梁錦松加入政府前，都領導過呢個委員會，只不過隨着近年涉及課程及學制改革嘅前期工作已經搞掂晒，並進入實行及檢討階段，令到呢個原來相當重要嘅委員會被束之高閣，間接令委員會嘅領導層重要性大減。
Moses擔任咁多公職，相信好熟悉政府政策同思維，擔任諮詢組織領導工作可謂綽綽有餘。不過，可惜煲呔曾呢個看守政府任期得番十幾個月，唔少諮詢組織都變得可有可無，就算有滿肚大計亦有志難伸，睇怕都要到下屆政府先至可以有一番作為。