政情：周一鑊出差賴低蘇州屎
一個副局長嘅仕途如何，非常視乎佢跟着邊個老闆。好似食物及衞生局副局長梁卓偉咁，經常被佢老闆周一鑊玩死，遠嘅唔講，淨係講近期內地孕婦來港產子一事鬧得熱烘烘之際，佢周一鑊竟喺發表七招應對後，未有交代落實細節就匆匆飛往南美出差，再次丟低一大堆蘇州屎畀佢歎。
周一鑊將於後日到美洲出差兩星期，先到加拿大、智利、巴西三國，最後更跨越整個大西洋，到瑞士日內瓦出席世衞大會。佢話，日本爆發核危機，內地食品又多番出問題，希望可以藉今次考察，增加入口當地食物喎。查實現時令港人最不安嘅，莫過於內地層出不窮嘅山寨食品，有冇智利三文魚或巴西雞翼食反而係其次。
周一鑊咁鍾意出差，點解唔返內地處理好呢啲急切問題先呢？反而一走了之。嚟緊本港針對內地孕婦嘅爭拗及有關醫生護士人手不足嘅問題，將會不斷升溫，周一鑊咁好「關照」，梁卓偉想唔自求多福都幾難嘞。