政情：孫啟烈：派錢累街坊
政府施政瓣瓣都唔掂，向市民派發六千元安排搞到一鑊泡，明日實施嘅最低工資法例更帶來無限隱憂。一向敢言嘅工業總會主席孫啟烈，對呢兩方面都睇唔過眼，繼早前反對最低工資立法後，日前又開腔批評政府派發六千元，認為此舉係開壞先例，連累下屆政府之餘，仲要關愛基金諗計補鑊。
孫啟烈直言，政府派錢派得好冤枉，佢一針見血咁話︰「特首事前無理由唔知，但照樣首肯派錢，係開咗個壞先例，令到政府管治威信盡失，連下屆政府都畀佢連累埋，總之以後政府一定受影響。」孫主席仲話，現時派錢唔係個個有份，搞唔掂民怨又要搵關愛基金諗計補鑊。
咪以為關愛基金幫手補鑊執漏好容易，孫主席透露，其實關愛基金籌錢好艱難，事關一開始就搵晒啲大孖沙捐錢，個個捐幾千萬、甚至幾億，搞到其他捐幾百萬嘅善長當堂無晒癮，相信以後搵人捐錢會更加艱難。孫主席鬧咗咁耐，歸根究柢都係財爺鬍鬚曾失職，做到咁不如辭職好過。