政情：張建宗爛gag證體健
最低工資明日正式實施，一手湊大最低工資嘅勞工及福利局局長張建宗，尋日現身勞動節酒會時心情勁輕鬆，期間講起有高官相繼病倒，佢就搞爛gag證明自己身體健康。張建宗笑笑口話，過去幾年人哋問佢有無做運動，佢都回答話自己做咗最辛苦嘅運動，就係「工資保障運動」！雖然呢項運動失敗告終，但佢就死撐話：「唔失敗又點會有最低工資立法呢？」
每日運動半小時
其實張建宗平時真係有做運動，佢透露每朝早會抽半個鐘做運動，項目包括呼拉圈、跳繩、健身單車、sit up同埋划艇機，仲一邊出汗一邊睇新聞，風雨不改。至於飲食方面，張建宗再搞爛gag話，一星期會去三、四次「倫敦！」係倫敦酒樓呀！事關唔少勞工界都鍾意喺嗰度設宴，為表尊重，佢都會食少少嘅，平時就食屋企整嘅多菜少肉午餐，所以佢話自己好健康喎！