政情：孫公八字不利要過三難關

楊師傅年初幫一班高官批算兔年立春八字時，已算出為官者虛浮無力，靠山不穩，當時批中生肖屬兔嘅財爺鬍鬚曾及屬猴嘅教育局局長孫明揚運氣最差，結果好嘅唔靈醜嘅靈，中咗鬍鬚曾炮製「史上最廢」財政預算案後，估唔到連孫公健康都真係出問題，而且仲爆出多名高官因病入院大修。一班高官身體咁虧，莫非佢哋今年流年不利，衰氣纏身？

兩個時辰最擇使

我哋尋日再搵楊師傅再深入推算孫公嘅運程，假設孫公嘅出生八字中嘅年、月、日三柱，即一九四四年四月七日呢個出生日期無錯嘅話，年初嘅批算已有六至七成準確，假如有埋第四柱出生時辰嘅話，準確度會高達八成。楊師傅話，有兩個時辰對佢最不利，包括丙戌時（晚上七點至九點）及丁亥時（晚上九時至十一時），當中以丙戌時最兇險。

楊師傅話：「如果佢老人家係丙戌時出生，今年農曆五、六月將會係一個難關，會好難捱，即使捱過，到戊戍九月形勢會更加險峻，但如果他是丁亥時出生，咁就可以大步檻過嘞，到二○一八年再算過。」至於點解丙戌時出世咁差呢？楊師傅話，孫公今年「火」、「土」旺盛，腎屬「水」，「土」係剋「水」嘅，加上九月忌「火」、「土」，好自然出事。

批中煲呔曾出事

楊師傅過去幾年曾經批中煲呔曾會喺牛年農曆九月出事，當年煲呔曾就爆出「慳電膽涉嫌益親家」醜聞，上年又批中保安局局長李少光同發展局局長林鄭月娥流年麻煩多多。不過，楊師傅好慨嘆話，人生無常，佢稍後會再算一次高官嘅八字，睇吓有冇走漏眼，希望幫佢哋趨吉避凶喎。