中環出更：郭志怡開餅店賀世紀大婚
時尚名人郭志怡（Bonnie）首間餅店，尋日開張大吉。撞正英國威廉王子大婚之喜，Bonnie雙倍喜悅，親自炮製迷你結婚蛋糕，遙賀一對新人，又邀請成班好友到旗下中環SEVVA餐廳開Party，邊食蛋糕，邊睇世紀婚禮直播。
名門之後嘅Bonnie，向來追求生活品味，近日搖身一變成為「禮餅王后」，喺中環歌賦街開設高級餅店Ms B’s CAKERY。Bonnie捧住新鮮出爐蛋糕，滿場飛招呼賓客。名髮型師Kim Robinson及SEVVA餐廳老闆之一嘅邵在正齊到賀，邵生係邵逸夫姪孫，來頭不小。佢話，同Bonnie係生意拍檔，老友到極，最鍾意食Ms B’s CAKERY嘅24K金箔朱古力蛋糕喎。
Bonnie製餅好高要求，每款蛋糕都「穿上」華麗外衣，但成分絕對無糖，啱晒怕肥女士。佢話，食蛋糕要色香味俱全，並非只為填飽肚。新餅店投資咗幾多就唔講，但老闆娘野心不小，嚟緊將進軍中國市場開分店。
望住穿起禮服嘅威廉王子喺電視螢幕出現，Bonnie十足小粉絲，大叫：「He is very handsome！」大讚威廉王子好靚仔。
