中環出更:詩閣手藝精名流型男獨愛

香港頂尖度身訂造男裝品牌詩閣(Ascot Chang),上周喺中環舉行時裝騷,展示成立逾半世紀嘅成就,城中名流型男齊撐場,將現場逼得水洩不通。

詩閣客戶粒粒巨星,包括美國前總統喬治布殊、畢彼特及法國總統薩爾科齊等。城中客戶就有電視廣播主席邵逸夫及前中信泰富主席榮智健等。當晚全國人大代表王英偉囝囝王梓軒、東華三院總理王賢誌、中華廠商會副會長施榮懷及會董梅應春一家都現身撐場,眾人對詩閣嘅手工及服務質素讚不絕口,養和醫院心臟科專科醫生何鴻光仲封詩閣係「恤衫之王」添!

詩閣已故創辦人張子斌係浙江人,五十八年前喺尖沙咀創業,憑藉精湛裁縫手藝,獲取無數社會名流嘅信任,至今全球已有十多間分店,其中半島酒店分店更有近五十年歷史添!張子斌嘅囝囝、董事經理張宗琪(Tony)已接手家族生意,當晚佢同成個餅印一樣嘅囝囝Justin忙到滿場飛。

至於同張子斌一齊打天下嘅胞弟、董事總經理張德祥,當晚忙得不亦樂乎,張太范元芳、囝囝張宗豪夫婦亦現身撐場。張家三代傾巢而出,齊心省靚招牌。

王梓軒同Justin係小學同學,至今感情深厚,當晚特登抽空撐場。梅應春撐詩閣撐得最徹底,佢已幫襯詩閣幾十年,連佢囝囝、星馬菜館「海南少爺」股東之一梅慶豐,自細都係着詩閣嘅睡衣長大。梅慶豐就話,佢衣櫃內清一色詩閣恤衫,冇其他牌子架!

施榮懷讚服務貼心

施榮懷笑稱已着詩閣靚衫十幾年,但從來冇畀錢,事關梅應春係佢囝囝嘅契爺,所以每年送三件畀佢做生日禮物。佢盛讚詩閣嘅布料及手工一流,去年有日Tony約佢哋出嚟食飯,知道施榮懷瘦咗廿磅,即時攞尺出嚟幫佢重新度身,貼心服務令佢感受至深。

咪以為詩閣恤衫實好貴,張德祥告知卓妮,佢哋啲恤衫由八百元至八千元不等,中間價位約一千三百元,豐儉由人。

卓妮

Money18免費即秒股票報價網站現推出8升級功能,財經資訊,實時實發!