關愛基金成立以來，負面新聞多多。不久前，關愛基金交出首份功課，提出十項扶貧措施，惜「三無人士」仍然無份，被批有違政府最初成立之旨意，即協助每次政府派糖都派唔到的「漏網之魚」。
近日，關愛基金又被批運作唔夠透明。事關百億元關愛基金，聲稱由政府同商界各出資五十億元，政府現在仍唔肯公布實際籌款數字，故坊間揣測基金吸水無力。總之，夕陽政府連搞慈善都神神秘秘，好似瓣瓣都見光死。
香港的確大把有錢人，本來五十億真係濕濕碎，問題係政府推出時欠周詳計劃，令富豪疑慮多多。其中有位地產商一開始就表明，無論家族私人與上市公司都唔會捐，皆因唔清楚啲錢點用，如果因為要畀面而捐獻，便等於額外徵稅。如今想起來，此君果然有先見之明，關愛基金成立半年已被人質疑變質。像資助清貧學生出境旅遊而非關愛N無人士，便使人有本末倒置，用錢用得「不給力」之感。
其實，政府庫房水浸，一早自己攞一百億出嚟成立關愛基金，就唔使搞到今日咁尷尬嘅局面。梁啟超一早便說：「我們中國人最大的缺點，在沒有組織能力，在沒有法治精神。」要言之，人多並不好辦事，歐美人士倒是合起十個人，力量便加十倍，合起千百萬個人，力量便加千百萬倍；中國人不然，多合了一個人，不但力量不能增加，因衝突掣肘的結果，彼此能力相消，比前倒反減了。
政府話下月初才向立法會交代關愛基金的事宜，但願關愛唔好變「關人」！