政情：入境處新星駐京屢遇災
自從做過港府駐京辦事處嘅陳國基獲委任為入境處處長，駐京職位似成為咗入境處部門內晉升嘅必經之途，啱啱升任助理處長（簽證及政策）只有一個月嘅曾國衛，喺○七年至一○年間同樣借調過駐京辦，佢同傳媒講到自己簡歷嘅時候，就被問及點睇自己呢條「直升機」之路，佢聽完問題之後報以笑容話千祈唔好咁講，不過喺駐京期間確實了解到唔少國情。
年僅四十七歲就晉升管理層嘅曾國衛話，駐京好多時要同內地官員接觸，但喺內地架構複雜職位多，要搞好件事，一定要搵啱對口單位，而內地官員好講求信任，當取得對方信任之後好多事情都好傾好多，呢啲經驗對佢嚟講都非常寶貴。
曾國衛駐京期間遇上汶川地震同埋豬流感，佢憶述當時需要飛去唔同嘅地方協助喺當地嘅港人，內蒙、西藏同雲南等地都去過，「不過記憶最深嘅反而係患有精神病而喺內地嘅港人，佢哋有時冇家人喺身邊，好需要我哋嘅協助。」