民建聯日前舉行辛亥革命交流團誓師時，遭社民連踩場抗議，搞到該黨主席譚耀宗極為面懵。譚Sir其後喺鏡頭前嚴詞狠批社民連搞事嘅行為，令佢諗起自己嗰個好鍾意成日大嗌嘅兩歲孫女，又寸社記班示威者「心智未成熟」。譚Sir話音落地，唔少人都替佢嗰位被擺上台嘅孫女可憐，譚Sir自己更畀人瘋狂惡搞。
「孫女論」一出，有網民即時用譚Sir個樣設計海報，再配以「乖孫，爺爺同你玩，記住唔好亂咁叫呀」嘅標語，揶揄譚Sir一番。唔少社民連成員更喺網上笑言，孫女咁細個已經識得好似社民連咁同譚Sir搞對抗，真係大有前途，社記應該盡早拉佢個孫女入黨喎。
當日有份示威嘅「長毛」梁國雄尋日就話，若果譚Sir將示威者嘅叫喊聲等同佢孫女嘅「大嗌聲」，咁佢呢位「爺爺」真係好專制，事關佢竟然可以對孫女嘅叫聲充耳不聞：「如果一個家長聽到小朋友大嗌都唔理，係會車毀人亡架！」