政情：倒劉派借張學明篡位

當場一口拒絕

鄉議局主席及兩個副主席嘅「三頭馬車」，一直由發叔、張學明及林偉強擔任，而過去多屆改選只聽到兩位副主席遭受挑戰，但就好少出現有人挑戰發叔個主席寶座。隨着律師會副會長何君堯取代發叔入主屯門鄉委會，以及發叔部分親信嘅鄉委會主席之位相繼被取代後，牽引發叔嘅鄉議局大主席寶座亦動搖。據悉，鄉事派日前就搞咗場「鴻門夜宴」，策動逼發叔退位讓賢。

有鄉事派中人透露，出席鴻門夜宴嘅鄉紳唔多，當中包括發叔嘅親信張學明，席間有人推舉學明參選挑戰發叔，並力陳利害，但學明當場一口拒絕，強調要同發叔共同進退，之後事件就不了了之。事後有人分析，事件可能涉及倒劉派想借學明逼走發叔，可收一石二鳥之效，一方面可騰出學明嘅副主席之位，同時逼學明走上叛徒末路，即使做到主席都未必做得長久。

發叔地位受到動搖，佢兩名副手亦不能置身事外，當中以副主席林偉強嘅地位最危。自從小強被「黃衫軍」代表黃漢權取代成為坪洲鄉委會主席後，連帶離島區議會當然議員及區議會主席之位都無埋，據聞黃漢權計劃再下一城，同小強爭做鄉議局副主席，就算贏面不大都要爭過，加上早前傳出荃灣鄉委會主席鍾偉平都有意參選，搞到小強嘅地位危過危地馬拉。

林偉強好牙煙

據聞發叔始終都係鍾意小強冧莊陪伴左右，皆因小強聽教聽話，甚得發叔歡心，所以鄉郊有傳話：「活動有小強，絕對無冷場」。不過，鍾偉平都係自己人，加上有人質疑發叔係咪仲值得保住小強呢？所以二選一之下令發叔好頭痛。又有人話，既然黃漢權要落場同小強砌過，鍾偉平自然可以「人選我選」之勢加入戰團，所以有講法話，如果能夠勸退黃漢權，小強就可以喺無對手下順利連任，否則難免出現三人混戰局面。