中環出更：施榮忻古法學「煲冬瓜」
中港兩地經貿關係密切，普通話成為必須嘅語言，要學好普通話，名人有妙法。育有兩個女兒嘅百仁基金主席施榮忻（Jaime），尋日現身沙田馬場時話，佢個寶貝大女Victoria就讀嘅學校選用普通話教學，日子有功，囡囡唔單只用普通話溝通，連唸詩、朗誦都無難度，而且水準唔錯添。Jaime仲話，只要學好普通話，文章至會寫得好喎！
不過，Jaime就話自己學生時代冇機會學普通話，亦未參加過遊學團，全靠自學。卓妮聽佢啲普通話都講得唔錯，問佢有乜辦法學得咁好？Jaime笑稱，佢來來去去只得三招，即係睇戲、唱歌同放膽去講喎。卓妮記得青年事務委員會主席陳振彬都有講過學習普通話嘅好方法，就係經常請啲內地朋友去食飯，透過普通話交流練習，日子有功下，自然學得一口流利普通話。