中環出更：金刀梁生日妻兒送驚喜
生日一年一次，好多人都會大事慶祝，但行政會議成員梁智鴻（金刀梁）就年年都唔記得自己生日，亦唔記得慶祝結婚周年紀念，搞到佢太太同一對仔女都要扮失憶。不過，梁太今年忍無可忍，決定「親押」老公到餐廳慶祝七十二歲生日，身在泰國嘅孝順仔Eric就特登速遞自己返港，同爸爸切蛋糕，見金刀梁嘅笑容，就知佢幾開心嘞。
囝囝泰國專程返港
梁太一早瞞住老公喺灣仔君悅酒店嘅新扒房訂咗枱，仲全日都不動聲色，到傍晚時分，金刀梁如常去接梁太返屋企，點知行行下，梁太忽然話想試下君悅間新扒房，金刀梁當然唔敢say no啦，兩公婆於是拍拖過君悅。同一時間，囝囝Eric落機後火速前往君悅，同爸爸幾個好友一齊藏身喺扒房內，靜待金刀梁出現，帶來無限驚喜。
成功幫老公做生日嘅梁太，尋日同卓妮講起佢點呃老公時，難掩喜悅︰「我老公好易畀我呃倒，佢真係以為我同佢食餐飯咁簡單，佢都唔知個仔會特登返嚟同佢切完蛋糕就走，佢成日話每年喺愛滋病基金會周年活動有生日餅食，就當係慶祝囉喎！」
卓妮