「以前有朋友擔心阿女負累我，但我從來無咁諗，我做母親好希望有生之年湊大佢，完全無諗過放棄！」雖然紫雪是智障人士，無能力表達自己，但在練太眼中猶如小天使般可愛：「佢真係好得意，佢認得我㗎，雖然唔識講，但知我係佢媽媽好愛錫佢，聽到我把聲就好有反應咁望住我，表現得好開心好興奮。」
回望愛女短暫的人生，她仍深感悔疚：「嗰時經濟唔好，老公失業，我大住個肚去做警衞，每月賺四、五千蚊養一家三口，屋企連電話都無裝，為打工我無去做產前檢查，點知有日喺屋企突然穿咗羊水，遲咗去醫院，要喺屋企生，搞成阿女咁。」
「初頭諗住救唔番，點知救得番，真係好開心，點都係一種緣分。」照顧小朋友要付出很大心機，照顧紫雪更要加倍心血：「佢啲筋骨好軟，扶佢、抱佢、餵佢都要好小心。」練太待先生找到工作，便辭去工作，專心養育紫雪，沒料到紫雪○九年就離她而去。