政情：陳茂波教子有良方
一到長假期，唔少父母都頭痕點樣督促子女讀書，紫荊青年商會尋日就搞咗個名人閱讀分享會，搵嚟會計界議員陳茂波（Paul）同資深DJ鄧藹霖分享吓讀書心得，點知講講吓變咗做教仔大會。
長假遊學嘗獨立
鄧藹霖尋日指，現今家長太緊張小朋友，搞到班細路冇晒自理能力，佢見過有父母因為擔心囝囝冷病，等佢一游完水就雙雙九秒九衝過去幫手抹身，小朋友就慣晒好似皇帝咁畀人服侍，大咗都唔識改變。
阿Paul就話子女喺佢心目中永遠排第一，不過佢識得點訓練佢哋。阿Paul透露，當囝囝細個時，不時周末都會送佢入度假營，等佢試吓過群體生活；到暑假或長假期，阿Paul又會送囝囝去遊學，開眼界之餘仲可以畀機會佢哋獨立，所以就算囝囝出國讀書都冇出現適應不良，證明教法大成功！