政情：洪為民鬧爆競爭法
競爭法係立法會未來年半嘅火熱議題，一直支持競爭法立法嘅菁英會常務副主席洪為民（Witman）相當關注事件，尋日出席公開活動時仲四圍問在場嘅立法會議員拎文件睇，平時日理萬機嘅Witman點解忽然咁想溫書先？原來本身係IT界出身嘅Witman，一直透過同界別嘅議員、資訊科技界代表譚偉豪攞料，點知IT豪退出咗競爭法草案委員會，Witman只好四出搵議員借文件嚟睇，希望睇清楚藏於細節嘅魔鬼。
Witman認為競爭法一定要立，不過如果好似依家呢條咁，油價、跨行業壟斷等應管唔管，唔應管嘅中小企又包攬晒，就立法嚟都無謂嘞！佢話唔明點解條例同諮詢時出入咁大，又寸商務及經濟發展局署理局長蘇錦樑，只識得向區會拉票，真正聽意見就好少。
促改善條文內容
Witman覺得政府應該做多啲實事，改善條文內容，咁到時自然得到議員支持，唔使用「農村包圍城市」策略闖關咁肉酸！