恐爭拗不夠客觀
尋日仲有評論指出，肥彭係虔誠嘅天主教徒，擔心BBC將來一旦面對宗教爭拗嘅報道，有最終決定權嘅肥彭可能會宗教至上，喪失客觀判斷，分分鐘影響埋新聞自由。
報道指出，肥彭信奉天主教，經常都會為天主教講好說話，好似上年教宗本篤十六世到訪英國，當地就有市民趁住呢個機會上街示威，抗議有天主教會虐待兒童，肥彭就即刻跳出嚟話，如果將所有事情都計到落教宗嘅頭上，就係缺乏理性同極度小器嘅表現。
報道又指，BBC近年出現蔑視基督教嘅言論已經愈嚟愈多，擔心肥彭接手後，會更加偏幫天主教。肥彭將來要平息呢啲紛爭，真係好考智慧。