政情：關愛基金撲水艱難
煲呔曾舊年十月喺施政報告公布成立百億關愛基金，聲稱會由政府同商界各出資五十億，當時更話好有信心籌足呢筆數。半年過去，政府一直唔肯公布實際籌款數字，坊間一直揣測根本就籌唔夠數，尋日仲更加爆出政府退而求其次，央求商界只需認捐頭一筆捐款額，唔需要即時科水，可以喺三年裏面分期付款。如此絞盡腦汁撲水，足證關愛基金吸水能力認真麻麻。
政府連搞慈善都神神秘秘，可見佢哋如今係何等虛怯。名義上負責管理關愛基金嘅督導委員會早幾日開過會，身為委員之一嘅立法會議員譚耀宗話，的確有委員喺會議上要求政府提交籌款進展資料，不過官員支吾以對，講極都講唔出一個具體數字，只係話會等到下個月六日，即係向立法會財務委員會申請五十億時先至會詳細交代喎。
設「認捐額」延期付款
關愛基金運作唔透明、當班委員冇到本來就不知所謂，不過更奇怪嘅係，政府當日喺會議上更加宣布，基金商界籌款部分會加入「認捐額」制度，承諾捐錢嘅人唔需要即時畀晒筆錢，只要喺三年內完成就搞掂，希望藉此吸引更多商界捐款。出現呢種咁尷尬嘅情況，相信同基金近排公布多個效用成疑嘅活動有直接關係，好似資助清貧學童參加遊學團咁，就畀好多人質疑冇迫切需要。
其實自從成立關愛基金嘅消息公布後，唔少人都炮轟呢個基金成立目的同意義都不明，就好似恒隆集團董事長陳啟宗咁，一開始已經講到明唔會捐錢，更加話呢個基金等同向商界雙重徵稅，就連現時做咗督導委員會成員嘅港大教授周永新亦曾批評，關愛基金係「目的不明嘅怪物」，由此可見佢成立之初係幾咁不得民心，個頭開得咁壞，往後籌錢自然就困難重重啦。
到底關愛基金籌夠商界嗰五十億未，下個月六日就自有分曉，大家想知佢搞唔搞得成，不妨到時埋位食花生等睇好戲。至於公帑支付嘅另外五十億，當日亦會表決撥款，暫時就冇乜聽過話啲黨派會反對，因為畢竟係慈善性質，依家又臨近選舉，相信冇人夠膽同選票過唔去嘅。