中環出更：何彭慧嫻鍾情珠寶
城中名媛Adler珠寶董事總經理何彭慧嫻（Patti）鍾意珠寶，幾時見到佢都一身珠光寶氣，貴氣逼人。日前卓妮喺佢有份創辦嘅慈善團體「心蓮心」活動上，見到佢戴住金鑽手鐲同埋靚戒指，同佢身上嘅金色薄紗外套襯到絕。
用鈦金屬配襯鑽石
Patti好鍾意珠寶，佢話後生時入咗行，就認定呢行一定係佢嘅終生職業，佢創辦Adler至今已經三十幾年。原來佢嘅丈夫都係做珠寶出口生意，難怪佢對呢行咁有感情。
做珠寶生意少啲眼界都唔得，Patti嘅審美眼光獨到，堅持完美，又經常自己設計珠寶，以求追上潮流。當日佢展示一個由鈦金屬製成嘅藍綠色花心鑽石心口針，設計獨一無二，好輕身，同傳統鑽飾相比，確實好輕盈，實唔怕整壞件靚衫。Patti話，鈦金屬以往只用嚟製造飛機，佢就用嚟配襯過百粒鑽石，砌成呢個價值二十九萬蚊嘅心口針，可謂創意無限。