政情：何世柱幫「無良」僱主求情

最低工資條例仲有一個星期就實施，但好多僱主仲未識得點樣計算工時及時薪，隨時誤墮法網。勞工顧問委員會資方成員何世柱尋日就預早幫啲僱主求情，話如果僱主只係無心之失計少咗僱員薪金，政府應從寬處理，唔好即時檢控。不過話說回來，好多人犯錯或犯法，都會話自己係無心之失㗎啦，所以究竟係咪蓄意要做無良僱主，都要睇具體證據，甚至交畀法庭判決。