政情：朱鼎耀代父杜拜領獎
每次遇見觀瀾湖太子爺朱鼎健（Ken）同朱鼎耀（Tenniel）兩兄弟，都好似同工作畫上等號。好似Tenniel咁，早前就忙於邀請美國高爾夫球名將「老虎」活士（Tiger Woods）到深圳觀瀾湖參觀，之後又要籌備「龍傳基金」慈善高球賽，日前更遠赴杜拜，代爸爸朱樹豪接受畢馬威高爾夫商務論壇（KPMG）頒發嘅終身成就獎。
Tenniel話，佢爸爸係首個華人得到KPMG頒發終身成就獎榮譽，所以覺得與有榮焉，佢仲盛讚爸爸比佢哋兩兄弟忙百倍，所以畀佢哋兩兄弟好大動力。現時Tenniel同阿Ken貴為全球最大高爾夫球場嘅揸弗人，兩人各司其職，嚟緊仲會揮桿入雲南，又要去美國展開酒店及房地產建設，咁多計劃，難怪佢好期待兩個快將畢業嘅弟妹返嚟幫手。
講番「老虎」活士到訪深圳觀瀾湖，Tenniel透露，當日老虎只係旋風訪問觀瀾湖十六小時，但吸引咗近萬個fans齊集球場，而且老虎近距離走近球迷示範球技，秩序依然良好，足以證明Tenniel嘅卓越管理能力。