政情：蝶后晒經歷撐港運會
審計署早前揭發東亞運動會超支混帳醜聞，唔少市民都慶幸香港冇申辦到更大型嘅亞運會，但其實香港人並非唔支持體育發展，亦唔代表本地班精英運動員唔掂。香港游泳隊代表、有「蝶后」稱號嘅施幸余，尋日就透過政府新聞網介紹自己嘅經歷，並推介即將舉行嘅第三屆全港運動會。
身兼港運會大使嘅施幸余，係十二項香港游泳紀錄保持者，包括女子短池五十米、一百米蝶泳及自由泳，實力一流。今屆港運會游泳比賽揀喺九龍公園游泳池舉行，佢回憶話，每次嚟到九龍公園游泳池，心情都好興奮同埋緊張，因為嚟親多數都係參加比賽，但其實呢度係佢嘅福地，事關佢第一次代表香港喺度出賽已攞獎，印象最深刻係兩年前嘅東亞運，亦同隊友喺度取得豐碩成果。
施幸余九歲已經開始習泳，十一歲就開始出賽，形容自己跳入水游泳一刻，就好似將魚兒放回水中，回歸自然，與水融為一體。至於點解佢咁鍾意蝶泳，原因好搞笑，小妮子話係因為姿勢好有型，影相好睇啲喎。