復活節假期唔一定要外遊，好似來自十八區共一百六十名年輕人，就參加咗青年事務委員會及民政事務局主辦嘅青年代表團，大前日浩浩蕩蕩出發到北京及河北進行城鄉考察，親身體會城市和鄉間嘅唔同面貌及國家近年嘅快速發展。呢班年輕人由青委會主席陳振彬（Bunny）帶領下，尋日到訪河北保定及石家莊，參觀咗保定市嘅新能源設施。
Bunny喺上月初提過，為選拔一百六十名年輕人搞到好頭痛，事關參加人數好踴躍，而且大部分報名嘅學生及在職青年，個個都好有質素，實在好難選擇。為咗加強參加者對國家歷史及發展嘅認識，Bunny話佢哋出發前要先參加三場內容涉及辛亥革命及國家十二五規劃嘅講座，返港後亦要出席分享會總結行程，絕對唔係遊玩咁簡單。
講番青年團行程，過去幾日先後到訪過天安門廣場、北京大學、參觀河北保定及石家莊，嚟緊會到西柏坡，與當地青年交流，仲會前往正定國家乒乓球訓練基地，了解國家培訓乒乓球運動員嘅情況及設施，五日行程認真夠晒充實。