政情：藝人濫藥李家仁最理解
一隻《小明上廣州》，令一般只會喺婦女節目現身嘅李家仁醫生，搖身一變成為網上熱爆嘅紅人。李家仁話一曲成名之後，令佢明白當紅嘅代價，理解到點解有藝人要借助濫藥減壓。
剖白當紅代價
創作及首唱該首兒歌嘅李醫生尋日接受電台訪問，剖白紅咗之後嘅心情。佢話以前唔理解點解藝人壓力大，依家終於明白，因為當你有首歌紅咗，你自然唔想第二首衰，跟住又有好多人訪問你，甚至畀狗仔隊跟。佢仲試過有人畀張相佢話「小明睡覺了」，其實係佢喺港鐵畀人影到搭車瞓着覺。
「歌唱事業」如日中天，勁多人搵佢開Show義唱，李醫生惟有上晝就做醫生、晏晝先變番小明，並求教作曲人韋然。韋然教佢好似莫華倫咁，有人搵你，你就話以你名義捐錢畀慈善機構先，咁啲冇咁有誠意嘅人自然就會縮沙。李醫生問韋然應該捐幾多先夠，韋然諗一諗，莫華倫就五萬，咁李醫生應該係八千！
李醫生尋日又搞咗個「小明唱遊生日派對」，為已經十歲嘅小明賀壽，期間遇到個後生仔舉牌想搵佢幫手求婚，李醫生不但冇托手㬹或收佢八千蚊，仲即場請對方上台發表愛的宣言，然後叮囑佢唔好玩玩吓。李醫生又喺派對上預告，小明暫時都唔會返內地，主要留喺香港發掘吓有咩景點好去，大家即管喺街度撞吓佢。