政情：平叔連環點出三副局死穴
點解特區政府嘅管治愈來愈看守？點解施政愈來愈多失誤？大家只要聽吓「庸官殺手」王永平，尋日點樣寸爆其中三位副局長就可以搵到部分答案。平叔由港珠澳大橋環評違規、教科書勁貴，再辣到增加汽車首次登記稅，列舉出三位相關嘅副局唔熟書，而且分別衰騰雞、無創意及捉錯用神，三位副局聽到，都應該自覺扭吓耳仔，返屋企攝高枕頭反醒吓！
自從法庭判咗港珠澳大橋環評違規後，環境局局長邱騰華就竄咗去北京，至今仍未蒲頭，剩低同樣非環保出身嘅副局長潘潔擋駕，一味官腔話官司進行緊，無可奉告，連上立法會交代都唔敢。面對呢啲庸官，平叔當然睇唔過眼啦，批評潘潔嘅表現係反映佢擔心講錯嘢，即係衰騰雞，二來根本唔熟書。平叔又話，如果大家將焦點轉移到環評機制，政府就好難唔回應嘞。
鬧完環評，平叔意猶未盡，再論教育政策。以前做過教統局嘅平叔，對教科書問題相當熟悉，一開口就拆穿教育局副局長陳維安嘅西洋鏡，直言將課本同教材分拆係解決唔到問題，應該要打破壟斷先得。譬如由當局訂好課程後，就去全球招標書商印書，再唔係就由教院或政府自己落手製作教材，或由政府成立基金，資助辦學團體製作教材，總之就係要大刀闊斧。不過，平叔就睇死呢屆政府處理唔到呢個問題。
平叔愈鬧愈過癮，繼而將炮彈射向運輸及房屋局副局長邱誠武，佢有啲不屑話，政府唔應該增加汽車首次登記稅，反正車稅只係針對買車嘅人，而有車同用車係兩回事，就算過去十年多咗人有車，但係用多咗道路嘅始終係的士，如果咁都加稅，除咗令庫房收入多咗及中產買貴車外，對改善交通擠塞有乜用呢？所以政府應該攞啲數據出嚟畀人睇吓先至下定論。
評論村屋僭建問題
除咗三位副局長捱轟外，平叔仲提及新界村屋僭建問題，覺得政府處理村屋及市區樓宇要一視同仁。平叔連環寸爆三位副局長嘅背後，其實就帶出咗政府嘅詬病，可惜佢忘記咗政府係唔聽意見嘅，於是不斷犯錯，睇嚟平叔今次都係嘥口水兼嘥氣架喇。