中環出更:扮嘢文赴賭城飲喜酒

美國賭業巨子、永利主席兼行政總裁史提芬永利(Stephen A.Wynn),經常穿梭拉斯維加斯及澳門兩個賭城,間中仲會嚟香港玩吓,去年六月卓妮就影到Stephen喺老友「蘭桂坊之父」盛智文(扮嘢文)帶路下,同外籍女友甜甜蜜蜜拍拖坐天星小輪去尖沙咀Shopping。卓妮近日收到好消息,原來Stephen下周六就會同女友拉埋天窗!

永利老闆做「老襯」

Stephen嘅婚禮將會喺美國永利拉斯維加斯酒店隆重舉行,大宴親朋,屆時場面肯定星光熠熠,唔少荷里活明星都會出席,扮嘢文同Stephen多年老友,當然唔少得佢嗰份啦!卓妮八到,呢位曾經同Stephen結伴來港嘅準新娘係英國人,佢哋兩年前喺歐洲邂逅,感情發展迅速,雙雙步入教堂真係可喜可賀!

所謂人逢喜事精神爽,Stephen上月剛獲美國財經周刊選為全球三十名最佳CEO(行政總裁)之一,加上永利澳門生意愈做愈旺,幾千名非管理層員工今年都有份加薪百分之六,可以講係搵到錢,勞資雙方都Happy。

Money18免費即秒股票報價網站現推出8升級功能,財經資訊,實時實發!