中環出更：《蝸居》女主角居港歎世界
香港樓價不斷攀升，買樓難過登天，年前以買樓作題材嘅內地電視劇《蝸居》成為熱捧劇集，劇中主角之一嘅靚女李念亦憑「海藻」一角竄紅，但現實中李念嘅際遇就好好多，唔使做「小三」（情婦），亦毋須做房奴，仲移居來香港過住悠閒少奶奶生活添！
下嫁商人做少奶奶
卓妮日前路過中環置地廣場遇見一身便服嘅李念行街Shopping，孭住潮牌Vivienne Westwood小手袋，配襯一身短裙同花花涼鞋，充滿青春氣息。原來小妮子去年底已靜悄悄嫁咗嚟香港，因為佢做生意嘅老公忙於工作，所以閒日下午就留下伊人獨個兒行街街嘞。
李念行入美國時尚品牌Juicy Couture後，一個箭步到首飾櫃揀頸鏈，睇中就叫店員幫佢戴起，照鏡睇吓好唔好睇，然後再行埋衣架度睇便服，差唔多拿得上手、拼得埋身嘅都叫店員包起，就連埋單都唔使睇幾錢，總之盡情掃貨，完全同劇中手緊嘅海藻判若兩人。
定居香港嘅李念話，目前想搵番份工做，各行業都無所謂，唔一定要做番老本行喎，但如果內地有適合角色，佢都唔介意同老公分隔兩地。不過，李念眼見身邊朋友嘅BB都生得精靈可愛，搞到佢都母性大發，好想快啲同老公製造一個愛情結晶。雖然話人生如戲，但幸福嘅李念應該係例外嘅。
卓妮