元朗區議會原副主席鄧胤楚，早排失落屏山鄉事委員會主席一職，即時失去區議會當然議員及區議會副主席職位，副主席一職需要補選。據聞區議會內六個來自鄉事派嘅當然議員之中，最少有三人都對副主席個位虎視眈眈，無論為面子或為聲譽，誓要落場爭位，爭奪戰一觸即發。
據悉，鄉事派中人見勢色唔對，擔心自己人打自己人，會讓外界感覺鄉事派唔團結，為免傷和氣，所以提議六個議員以抽籤形式決定邊個參選，並由鄉議局主席劉皇發做公證。呢個方法聽落好似唔錯，但至今仍未得到所有人認同，如果當中有人唔肯協調，企硬出來參選，咁就真係要落場砌過喇。
搞到如此田地，有鄉郊中人都感到驚訝，事關副主席任期剩低半年，冇理由會爭得咁激烈啩？咁諗就錯喇，事關鄉事派當然議員任期係到二○一五年，順利過渡到下屆區議會，所以如果今次爭贏咗做副主席，下屆區議會都極有可能冧莊架。